UN SAMAÍN MOI DIVERTIDO

Unha das festividades que máis lles chama a atención aos nenos de infantil é o Samaín, por iso esta semana estivemos a realizar algunhas actividades específicas para conmemoralo.

Comezamos quentando motores na clase de inglés da profe Laura, onde falamos desta festividade que nos países de fala inglesa chámase Halloween. Cantamos cancións e fixemos un divertido "calacú de halloween" coas nosas mans, que empregamos para decorar a porta do colexio.
Velaquí tedes as fotos.

Despois o alumnado trouxo ao cole calacús de verdade, decorados como a celebración require, que elaboraron na casa coa axuda das súas familias, e cos que participaron no concurso. Quedaron así de estupendos!

Ao ir a colocalas na exposición, aproveitamos para ver as que trouxeran os compañeiros doutros cursos de infantil e primaria, e de paso para falar da festividade e aprender novo vocabulario.

O martes 29 tivemos a sorte de gozar cun conto que prepararon para nos con moito agarimo dúas alumnas de quinto de educación primaria. As tres clases de infantil fomos ao recuncho do contacontos da biblioteca escolar e alí, ben caladiños e atentos, escoitamos abraiados un conto cheo de sombras aterradoras e monstruosas ... que a cada momento non resultaban ser tal!
Mirade qué atentos estabamos e qué ben o fixeron as nenas de primaria.

 Contacontos de Samaín na biblioteca escolar

 Alumnas de 5º de Educación Primaria que fixeron de contacontos

 Alumnado de tres, catro e cinco anos escoitando con atención o conto.

Quedamos tan encantados que démoslles as grazas con moito agarimo por ter sido tan boas narradoras! Encántannos estas actividades de participación do alumnado dunha etapa co doutra!

Ese mesmo día desenvolvemos as nosas habilidades plásticas na clase elaborando unha aterradora bruxa cun peiteado orixinal. Aquí tedes a mostra.

O mércores 30, as actividades de Samaín xa centraron a xornada. O corredor de infantil amenceu decorado para a ocasión con todo tipo de elementos representativos desta festividade como podedes ver nas seguintes imaxes.

Despois dunha sesión de psicomotricidade, na que en equipo vencemos a todo tipo de monstros que habitaban o "castelo embruxado" no que convertemos para a ocasión o ximnasio, e de facer unha tea de araña moi artística, realizamos una actividade de cociña en grupo elaborando unha "Torta de miñocas" que nos quedou riquísima.

Coma sempre, comezamos por limpar ben as mans e a zona de traballo, como fan os bos cociñeiros. E despois fomos falando do que iamos a facer, e presentando os diferentes utensilios e ingredientes cos que tiñamos que traballar: galletas de oreo, biscoito de chocolate, miñocas de gominola e ollos de chocolate.

Comezamos esmagando con esmero unhas galletas de oreo para facer a "terra" da nosa torta na que habitan eses vermes de gominola tan ricos.

A continuación fomos desmigando o biscoito de chocolate para ter máis terra que botar a nosa deliciosa torta.

E mesturamos a dúas "terras" con moito agarimo e delicadeza...e aguantando as ganas de chupar os dedos!

Este foi o resultado. Só quedaba evitar a tentación de comer as chuches antes de colocalas na nosa torta de miñocas.

E velaquí o resultado final! Unha deliciosa torta de Samaín elaborada entre todos, da que gozamos do mesmo modo.

Podedes facer a proba na casa, está riquísima! Comemos toda a nosa porción, e algúns mesmo repetimos, e todo a pesar de ter comido antes a merenda!

E como fin de festa, qué mellor que pintar a cara con divertidos debuxos de elementos típicos desta data e ir a pasalo ben ao photocall de Samaín? 

Alumnado de 4 anos pintado co deseño da súa elección

Pasámolo xenial! Verdadeiramente foi un Samaín ben divertido!

Pequeciencia: A importancia de lavar ben as mans

Dende ben pequenos a todos nos repetiron unha e outra vez que antes de comer había que lavar ben as mans. Quen non lembra a súa nai, o seu pai, ou mesmo aos avós dicindo antes de cada comida, “lava ben as mans”!? Esa pequena frase vai facendo que vaiamos adquirindo pouco a pouco ese hábito da nosa hixiene: lavar as mans antes de tocar a comida.

Pero, por qué é tan importante? Qué ten que ver iso de lavar as mans coa comida? E coa hixiene e a prevención de enfermidades?

Dentro do campo da educación para a saúde, no cole pensamos que os hábitos de hixiene temos que adquirilos dende ben pequenos, e ademais da forma máis lúdica e visual posible, para que os nosos descubrimentos, se convertan en  aprendizaxe e esta reforce as nosas rutinas diarias no que á saúde se refire.

Por iso para facer ver ao noso alumnado da importancia que ten para a nosa saúde lavar ben as mans con xabón antes de tocar alimentos, co fin de previr enfermidades, optamos por facer un experimento de laboratorio para que eles mesmos chegasen as súas propias conclusións sobre o tema.

Así que as tres clases de tres, catro e cinco anos de educación infantil, fomos ao laboratorio para comprobar experimentalmente qué ten iso de lavar as mans que ver coas enfermidades.

Comezamos aprendendo que as bacterias e os virus están por todas partes, e mesmo que moitas delas son boas, pero outras non tanto e son as responsables de producir as enfermidades. Por quendas, o alumnado foi falando da súa experiencia coa enfermidade, sobre qué nos ocorre cando estamos enfermos, cómo nos sentimos, qué nos doe, etc.

Despois fixemos unha pequena proba cunhas “bacterias” un pouco máis grandes do normal (xa que as de verdade non somos quen de miralas a simple vista). Puxemos nun prato uns graniños de especias a modo de bacterias ficticias, e comprobamos qué pasa cando tocamos as cousas que empregamos a cotío na clase: as bacterias quedan pegadas aos nosos dedos!

A continuación cos dedos cheos de “bacterias ficticias”, reflexionamos e traballamos a formulación de hipóteses, pensando qué vai acontecer con esas bacterias das nosas mans se tocamos a merenda? O noso alumnado acertou axiña o que pasaría, que se pegarían á nosa comida e despois as tragaríamos; pero por si quedaba algunha dúbida, tocamos un bocadillo de broma feito con plastilina, e alí estaban xa as bacterias que antes estaban nas nosas mans.

De seguido puxemos nun pratos auga coas bacterias ficticias feitas de especias e comezamos o experimento.

Por quendas, fomos botando nun dedo dos alumnos unha pinga de xabón de mans, e observamos qué acontecía coas bacterias cando tocamos a auga chea de bacterias co xabón. Marchan todas! Afástanse do xabón de súpeto!

Nos seguintes videos podedes comprobalo.

Experimento con alumnado de tres anos

Experimento con alumnado de catro anos

Experimento con alumnado de cinco anos

Deste xeito tan sinxelo ningún deles quedou con dúbidas e comprobou experimentalmente que o xabón é un medio moi eficaz para eliminar as bacterias das nosas mans. Aprendemos non só a formular hipóteses, senón tamén a ver e entender o porqué da importancia desa rutina de lavar as mans que seguimos tódolos días despois de subir do patio e antes de tomar a merenda.

Deste xeito tan divertido imos introducindo ao noso alumnado no mundo da ciencia ao tempo que facemos educación para a saúde.

Estade atentos que neste curso haberá moita máis “pequeciencia”!

Aprendendo sobre o noso corpo

Na clase de 4 anos estamos a descubrir cómo é o noso corpo. Todos somos diferentes e temos características propias que nos fan únicos e especiais, pero tamén cousas que nos fan semellantes uns aos outros. 

Na nosa investigación estamos a traballar sobre as partes que forman o noso corpo, e  aproveitamos para traballar a linguaxe e o vocabulario, mentres traballamos a nosa creatividade coa plastilina.

Cada un representouse a sí mesmo facendo un monicreque. Mirade que ben lles saen!

A continuación  comezamos a indagar sobre qué temos no noso interior, aquilo que non podemos observar a simple vista: o noso esqueleto.

Coa axuda da nosa mascota "Roto" descubrimos que o noso interior está cheo de osos de diferentes formas e tamaños, e que podemos observalos grazas as radiografías. 

Despois das nosas pesquisas, cada un construíu coas súas propias mans, un esqueleto articulado para poder observar a posición do mesmo cando corremos, saltamos, ou facemos exercicios ximnásticos. Foi do máis divertido como podedes comprobar nas seguintes imaxes.

E para rematar co esqueleto, qué mellor que ver unha replica no laboratorio? Ata alí fomos de excursión polo cole, para descubrir qué tamaño teñen en realidade os osos, e se son brandos ou duros, flexibles ou ríxidos, e nomear mentres as movíamos, as principais articulacións do corpo. Pasámolo xenial!

No laboratorio tivemos a oportunidade de falar sobre qué importantes órganos protexen as nosas costelas, e que órgano vital atopamos dentro do noso cranio: o cerebro, responsable de que sexamos quen de aprender, e ser tan listos. Mesmo puidemos comprobar cómo é cunha réplica do mesmo, e así de paso aprendemos novo vocabulario. Velaquí tedes a mostra.

Quen sabe se entre o noso alumnado teremos nun futuro algún médico ou membro do persoal sanitario! Polo momento continuaremos coas nosas pesquisas, mentres traballamos o seu pensamento científico, a súa creatividade e o seu interese polo descubrimento do mundo. Mantédevos atentos á páxina web do cole e ao noso blog!

Cantando en inglés

Cómo cantan estes rapaces e rapazas de 5 anos

Aniversarios de setembro

Esta primeira festa de aniversarios contou coas homenaxeadas da clase de cinco anos Imán e Antía.

Benvida a un novo curso

Comezamos un novo curso con moitos retos e novidades.
Damos a benvida ás novas incorporacións e aos nenos e nenas da clase de tres anos. E, por suposto, unha aperta moi forte a todos os rapaces e rapazas que seguen connosco.
Neste blog poremos fotos e videos de saídas ou actividades q faremos ao longo do curso.

Un saúdo de parte do equipo de mestres e mestras de E. Infantil.