Matemáticas manipulativas e comestibles!

Na clase de 4 anos continuamos a experimentar cos conceptos matemáticos, das formas máis diversas e divertidas. E o noso alumnado está a aprender sen decatarse mentres o pasa ben, manipulando os diferentes materiais que imos empregando.

Para traballar a secuencia numérica, ademais dos materiais que xa vos presentaramos na entrada da páxina web do cole http://quinonesdeleon.es/matematicas-manipulativas-en-educacion-infantil/, estamos a empregar novos materiais con moi bo resultado. Entre eles os números magnéticos que o noso alumnado ten que poñer en orde.

Todos o fan tan ben que imos ampliando o reto!, e xa non so os ordean, senón que tamén son quen de escribilos e representar en puntiños a cantidade que representan, como podedes comprobar nas seguintes imaxes.

Tamén experimentamos sensorialmente cos números. Empregamos o tacto con números sensoriais que podemos tocar, e que se transforman en estradas para os nosos coches de xoguete. Esta é unha forma divertida de aprender o seu trazado, que practicamos igualmente con cordas de cores e outros materiais. Aquí vos deixamos un exemplo.

E aproveitando o noso proxecto da alimentación saudable coa mascota Roto, traballamos os números cociñando uns deliciosos espetos elaborados con seis froitas de outono diferentes. Deste xeito aprendemos manipulativamente o número seis ao tempo que gozamos cunha alimentación saudable. So tedes que ver a súa cara para comprobar o moito que lles gusta este tipo de actividades.

Alumnado facendo espetos de seis froitas de outono 

Alumnado calculando cantas pezas de froita quedan a medida que van comendo

 O mellor foi que todos probaron as diferentes froitas e mesmo houbo quen descubriu que lle gustaban tanto os espetos que fixeron, que repetiron varias veces!

Como podedes comprobar os números e as operacións matemáticas de engadir e quitar poden ser do máis divertidas e saborosas. 

Minichefs Quiñones: preparando un menú saudable

No marco do proxecto de alimentación que estamos a desenvolver na clase de catro anos, pasamos da teoría á práctica, e puxémonos a cociñar! Coa axuda do noso receitario, eliximos unhas receitas ben saudables e sinxelas de elaborar, para traballar cociñando en equipo.

De primeiro prato escollemos unha rica e saborosa “Ensalada de flores”, feita con produtos da horta variados: tomates, espárragos, millo e espinacas.

Despois de lavar ben as mans e todas as verduras, comezamos a falar dos ingredientes da receita e do proceso de elaboración, que fomos seguindo paso a paso como podedes comprobar nas seguintes imaxes.

Tomade boa nota porque a receita paga a pena!

1. Lavar ben as verduras e hortalizas

2. Cortar os tomates en cuarteiróns, e ir colocándoos como se fosen os pétalos dunha flor.

3. Colocar no medio dos cuarteiróns de tomate uns grans de millo.

4. Colocar un espárrago a modo de talo da flor, e unhas espinacas limpas facendo as veces de follas.

5. Aliñar ao gusto, e a gozar desta saudable e divertida ensalada que poden cociñar os máis pequenos sen dificultade algunha.

Todos quedamos encantados coa experiencia de cociñar, e co resultado obtido.

De todo o que aprendemos, unha das cousas máis importantes foi comprobar que unha alimentación saudable non ten por que ser aburrida.

Volveremos a cociñar seguro, estade atentos!